ایمانقلی تاسماگامپیتوف، دبیرکل سازمان پیمان امنیت جمعی گفته که تقویت مرز میان افغانستان و تاجیکستان نه تنها اینکه برای دوشنبه، بلکه برای امنیت تمام کشورهای عضو این سازمان مهم و حیاتی است.
خبرگزاری تاس روسیه روز چهارشنبه،۱۰دلو/بهمن، در گزارشی گفته است که آقای گامیتوف، این سخنان را در دیدار با امام علی رحمان، رییس جمهوری تاجیکستان بیان داشته و از تلاشهای مقامهای تاجیکستان به هدف ایجاد این طرح و عملی کردن آن قدردانی نموده و خواستار همکاری در این مورد شدهاند.
دبیرکل سازمان پیمان جمعی گفته که «کار عملی روی این طرح آغاز شده و این برنامه برای پنج سال طرح ریزی گردیده و تهیه اسلحه و تجهیزات نظامی به هدف تقویت امنیت در امتداد مرز میان افغانستان و تاجیکستان در سال نخست به عنوان اقدامات ملموس در نظر گرفته شده که بسیار مهم است.»
پس از روی کار آمدن طالبان در افغانستان، کشورهای همسایه به ویژه کشورهای آسیای میانه همواره از گسترش تروریزم از افغانستان ابراز نگرانی کرده و بر لزوم اتخاذ تدابیر پیشگیرانه برای جلوگیری از گسترش تروریزم به آسیای میانه تاکید کردهاند.
طرح تقویت امنیت مرز تاجیکستان و افغانستان، برای نخستین بار از سوی رییس جمهوری تاجیکستان در نشست سازمان پیمان امنیت جمعی در قزاقستان در سال ۱۴۰۱ مطرح گردید که با استقبال کشورهای عضو این سازمان مواجه شد.
کشورهای روسیه، بلاروس، ارمنستان، قزاقستان، قرغیزستان و تاجیکستان اعضای سازمان پیمان امنیت جمعی اند.
