ایمانگلی تاسماگامبتوف، دبیرکل سازمان پیمان امنیت جمعی اعلام کرده که برنامه تقویت مرز تاجیکستان با افغانستان، که شامل اقدامات خاصی با هدف تضمین امنیت کشورهای عضو این سازمان است، در سال ۲۰۲۵ آغاز می‌شود.
سازمان پیمان امنیت جمعی در خبرنامه‌ای نوشت که ایمانگلی تاسماگامبتوف، رییس این سازمان، پنج‌شنبه، ۴ دلو/بهمن، در نشستی در مسکو دستاوردهای سازمان پیمان امنیت جمعی در سال ۲۰۲۴ و برنامه‌های پیش رو در سال ۲۰۲۵ را اعلام کرد.
سازمان پیمان امنیت جمعی در سه سال گذشته بارها از خطر گسترش افراط‌گرایی، تروریزم و مواد مخدر از افغانستان به آسیای میانه ابراز نگرانی کرده است.
طرح تقویت امنیت مرز تاجیکستان با افغانستان که بر اساس آن کشورهای عضو سازمان پیمان امنیت جمعی باید منابع لازم برای حفاظت از مرز تاجیکستان با افغانستان را فراهم کنند، در اواخر سال ۲۰۲۴ مورد توافق اعضای این سازمان قرار گرفت.
رسانه‌های روسیه گزارش داده‌اند که برنامه تقویت مرز تاجیکستان با افغانستان در سه مرحله و یک دوره زمانی پنج ساله اجرایی می‌شود.
در میان کشورهای عضو سازمان پیمان امنیت جمعی، تاجیکستان بیشترین نگرانی را از افزایش خطر تروریزم و افراط‌گرایی در افغانستان داشته است.
رییس جمهوری تاجیکستان بارها از وضعیت امنیتی در افغانستان ابراز نگرانی کرده و خواستار اقدامات کشورهای آسیای میانه در زمینه جلوگیری از نفوذ تروریزم به این منطقه شده است.
منابع آگاه امنیتی می‌گویند که در ولایت‌های تخار، کندز و بدخشان که مرز مشترک با تاجیکستان دارند، شماری از گروه‌های تروریستی، از جمله جماعت اسلامی انصارالله تاجیکستان، فعالیت دارند و از حمایت طالبان نیز برخورداراند. به اعتقاد آگاهان، این امر یکی از دلایل عمده نگرانی تاجیکستان از امنیت مرزش با افغانستان است.
