صادق امام، معاون وزارت امورخارجه تاجیکستان، از گسترش و فعالیت گروههای تروریستی و افزایش قاچاق مواد مخدر در افغانستان ابراز نگرانی کرده است.
آقای امام در حاشیه نشست«میانپارلمانی روسیه و تاجیکستان» به خبرگزاری تاس روسیه گفته که «ایدئولوژی رادیکالیسم مذهبی، امنیت کشورهای منطقه را بهطور جدی با خطر روبرو کرده است.»
وی گفته که«تعامل امنیتی» میان تاجیکستان و روسیه بیشتر بر مشکل افغانستان متمرکز است. او تصریح کرده که طالبان به اصولی پایبند نیستند و نباید در «مورد اهداف این گروه توهم داشت.»
این مقام دولت تاجیکستان افزوده که وضعیت افغانستان پس از خروج ائتلاف نظامی ناتو، نگرانکننده است و «روندهای در حال وقوع در این کشور بسیار متناقض به نظر میرسد.»
وی ضمن تاکید بر اینکه«شبکهسازی گروههای تروریستی» در افغانستان افزایش یافته، گفت که وجود ادعای طالبان مبنی بر ممنوع کردن کشت خشخاش، چاقاق مواد مخدر در سه سال اخیر از افغانستان به همسایهها و آسیای میانه افزایش چشمگیر یافته است.»
معاون وزارت امورخارجه تاجیکستان، گفته که«تاکید ما و سایر کشورهای همپیمان ما بر گفتوگوی مسالمتآمیز با هدف تشکیل یک دولت فراگیر با مشارکت نمایندگان همه جناحهای سیاسی و قومی افغانستان، است.»
در سه سال اخیر، تاجیکستان همواره از بروز مشکلات امنیتی در مناطق مرزی با افغانستان ابراز نگرانی کرده است.
این کشور یگانه کشوری در میان همسایههای افغانستان است که با طالبان روابط دیپلماتیک ندارد و سفارت افغانستان در دوشنبه هنوز از سوی مسوولین و کارمندان دولت پیشین اداره میشود.
تاجیکستان همواره مواضع تند و انتقادی علیه طالبان اتخاذ کرده و بر تشکیل دولت فراگیر با حضور همه اقوام، به ویژه تاجیکها در قدرت سیاسی، تاکید داشته است.
بدلیل موضعگیریهای تند دولت تاجیکستان علیه طالبان، شماری از افراطیون مذهبی و گروههای تکفیری در ولایت های همرز با تاجیکستان تبلیغات وسیع علیه دولت این کشور به راه انداخته و جوانان تاجیک را به پیوستن به گروههای تروریستی و«جهاد» در برابر دولت امام علی رحمان تشویق کردهاند.
همزمان گفته میشود که طالبان به جماعت اسلامی انصارالله که یک گروه تروریستی ضد دولت تاجیکستان است، زمینه فعالیت در بدخشان و مناطق مرزی با تاجکیستان را فراهم کرده است.
