کمیته امنیت دولتی تاجیکستان، کشته شدن دو سرباز این کشور در یک درگیری مرزی در مرز افغانستان را تایید کرده و از طالبان خواسته که بخاطر«بیمسوولیتی و عدم اجرای تعهدات خود» در قبال امنیت مرزها از مردم تاجیکستان عذرخواهی کنند.
کمیته امنیت دولتی تاجیکستان از گروه خاصی نام نگرفته است.
این نهاد امنیتی تاجکستان امروز، پنجشنبه، ۴ جدی/دی، در اعلامیهای گفته است که: «طالبان در انجام تعهدات بینالمللی و وعدههای مداوم خود برای تأمین امنیت و ثبات در مرز با جمهوری تاجیکستان و مبارزه با اعضای سازمانهای تروریستی، بیمسوولیتی جدی و مکرر کردهاند.»
در این اعلامیه ضمن آنکه از طالبان خواسته شده که بابت کشته شدن سربازان تاجیکستان، عذرخواهی کنند، از این گروه خواسته شده که«اقدامات موثر برای تأمین امنیت مرزهای مشترک با تاجیکستان انجام دهد.»
کمیته امنیت دولتی تاجکستان گفته که سه عضو یک«سازمان تروریستی» از خاک افغانستان به خاک تاجیکستان نفوذ کرده بودهاند، که در درگیری با مرزبانان تاجیکستان کشته شدهاند.
این کمیته افزوده که در این درگیری دو سرباز نیروهای مرزی تاجکستان کشته شده و اجساد سه عضو گروه تروریستی در نزد نیروهای امنیتی تاجیکستان میباشند.
پیش از این منابع محلی در ولایت بدخشان به رسانهها گفتند که درگیری روز گذشته میان طالبان و مرزبانان تاجکستان در شهرستان«شهربزرگ» بدخشان رخ داده و در آن دو عضو طالبان و دو تن از مرزبانان تاجیکستان کشته شدهاند.
تاجیکستان در چهار سال گذشته بارها از افزایش گروهای تروریستی و تهدیدهای امنیتی در مرزش با افغانستان ابراز نگرانی کرده و خواهان تقویت مرزها از سوی کشورهای آسیای میانه شده است.
این در حالی است که روز گذشته امام علی رحمان رییس جمهوری تاجیکستان سه پایگاه نظامی حفاظت مرزی در مرز افغانستان را افتتاح کرد و بر ضرورت تقویت تدابیر امنیتی در مرز کشورش با افغانستان تاکید کرد.
