وزارت امور خارجه تاجیکستان در بیانیه‌ای گزارش‌ها در مورد گفت‌و‌گوها درباره استقرار نیروهای روسی برای گشت‌زنی مشترک در مرز این کشور با افغانستان را رد کرد.
این وزارت گفته است که چنین معلوماتی نادرست و برای مخاطبان بین‌المللی گمراه کننده است. بر اساس این بیانیه، تاجیکستان به طور مداوم یک رشته اقدامات را برای تقویت وضعیت مرز روی دست می‌گیرد.
شاهین صمدی، سخنگوی وزارت امور خارجه تاجیکستان، نیز در گفت‌وگو با تلویزیون با افغانستان اینترنشنال، گفته که «ما این خبر را تایید نمی‌کنیم.»
پیش‌تر خبرگزاری رویترز گزارش داده بود که در پی کشته شدن پنج شهروند چین در مرز افغانستان و تاجیکستان، این کشور درباره احتمال استقرار نیروهای روسی برای گشت‌زنی مشترک در مرز با افغانستان در حال مذاکره با روسیه و سازمان پیمان امنیت جمعی است.
سخنگوی وزارت امور خارجه تاجیکستان گفته که رویترز با انتشار این خبر، اطلاعات تائید نشده‌ای را در اختیار خوانندگان خود قرار داده است.
امامعلی رحمان، رییس‌ جمهوری تاجیکستان، روز دوشنبه با رؤسای نهادهای امنیتی این کشور درباره تقویت مرز با افغانصتان گفت‌وگو کرده بود.
همزمان چین نیز به شهروندان خود که در فعالیت‌های معدنی و تجاری در منطقهٔ مرزی مشغول‌اند، توصیه کرد که فوراً آنجا را ترک کنند.
تاجیکستان در جند سال اخیر بارها نگرانی خود را از افزایش تهدیدهای امنیتی از افغانستان ابراز داشته و ازکشورهای آسیای میانه خواسته که در تقویت مرز این کشور با افغانستان همکاری کنند.
ناظران می‌گویند که تاجیکستان از ناحیه فعالیت گروه‌های تروریستی در افغانستان نگران است و برای رفع نگرانی‌های خود همواره روی حمایت مسکو حساب می‌کند.