وزارت امور خارجه طالبان در بیانیه‌ای حمله بر سه شهروند چینی در ولایت ختلان تاجیکستان را نکوهش کرده و گفته که این حمله از سوی گروه‌هایی انجام شده که برای «ایجاد ناامنی، بی‌ثباتی و بی‌اعتمادی میان کشورهای منطقه فعالیت می‌کنند.»
این نخستین بار است که طالبان به صورت رسمی تایید می‌کنند که گروه‌هایی در افغانستان فعال هستند که برای امنیت و ثبات منطقه تهدید به شمار می‌روند.
وزارت امور خارجه اداره طالبان در بیانیه‌ای که امروز جمعه منتشر کرده، گفته که برای شناسایی عوامل این حادثه، آماده‌ی همکاری کامل با دولت تاجیکستان است و در زمینه تبادل اطلاعات، همکاری فنی و ارزیابی‌های مشترک، آمادگی کامل دارد.
وزارت امور خارجه تاجیکستان روز گذشته اعلام کرد که در حمله پهپادی از خاک افغانستان به کارکنان یک شرکت چینی در استان ختلان تاجیکستان، سه شهروند چینی کشته شده‌اند.
در بیانیه‌ای وزارت امور خارجه تاجیکستان آمده که این حمله بر اردوگاه کارکنان شرکت «ال‌ال‌سی شاهین اس‌ام» با استفاده از یک هواپیمای بدون سرنشین حامل نارنجک و همچنین سلاح گرم در محدوده پاسگاه مرزی «استقلال» از واحد مرزی «یول» صورت گرفته است.
وزارت خارجه تاجیکستان تأکید کرده که با وجود تلاش‌های این کشور برای حفظ امنیت در بخش‎‌های مرزی با افغانستان، «گروه‌های جنایتکار مستقر در خاک افغانستان» همچنان به اقدامات بی‌ثبات‌کننده ادامه می‌دهند.
این وزارت با محکوم کردن حمله، از طالبان خواسته است تا «اقدامات مؤثر» برای تأمین ثبات و امنیت در مرز مشترک انجام دهند.
مقام‌های تاجیکستان گفته‌اند که این رویداد در نزدیکی یکی از نقاط حساس مرزی رخ داده است.
با این حال، دولت تاجیکستان نام هیچ گروهی را که مظنون به انجام این حمله باشد، فاش نکرده است.
تاجیکستان پس از بازگشت طالبان به قدرت در سال ۲۰۲۱ بارها درباره افزایش تهدیدهای امنیتی در مرزهایش هشدار داده است.
چین از سرمایه‌گذاران بزرگ در پروژه‌های استخراج و زیربنایی تاجیکستان است و بسیاری از شرکت‌های چینی در مناطق کوهستانی نزدیک مرز افغانستان فعالیت دارند.
تا کنون برغم هشدارهای کشورهای همسایه در مورد حضور گروه‌های تروریستی خطرناک برای امنیت منطقه در خاک افغانستان، طالبان این هشدارها را دستکم گرفته ومدعی می‌شدند که در خاک افغانستان گروه‌های تروریستی مستقر نیستند و این گروه اجازه نمی‌دهد که افراد وگروه‌های خاصی امنیت همسایگان را تهدید کند. اما بیانیه امروز وزارت خارجه طالبان به معنای تایید حضور گروه‌های تروریستی خطرناک در قلمرو تحت کنترول طالبان است.
این در حالی است که به تازگی تاجیکستان تلاش‌های دیپلماتیک خود را برای بهبود روابط با طالبان تشدید کرده است.
در مناطق مرزی افغانستان و تاجیکستان در گذشته از فعالیت گروه‌های تروریستی مختلف از جمله گروه انصارالله تاجیکستان گزارش شده است. این گروه از گروه‌های افراطی ضد تاجیکستان است که تا کنون تحت پوشش و حمایت طالبان افغانستان فعالیت داشته است.