کمیته امنیت ملی تاجیکستان از درگیری مسلحانه با گروهی از قاچاقچیان مواد مخدر در مرز افغانستان خبر داده و گفته که رهبر و یکی از اعضای گروه قاچاق‌چیان در درگیری مسلحانه با نیروهای مرزی تاجیکستان کشته شدند و حدود ۵۸ کیلوگرام مواد مخدر کشف و ضبط گردید.
خبرگزاری آسیاپلاس تاجیکستان، امروز، چهارشنبه ۱۱ سرطان/تیر، در گزارشی به نقل از کمیته امنیت ملی این کشور، گفته که یک گروه «از قاچاقچیان افغان را که در انتقال مواد مخدر از افغانستان به تاجیکستان دست داشتند، شناسایی کردند.»
در این گزارش آمده که قاچاقچیان از دستور ماموران امنیتی برای تسلیم داوطلبانه اطاعت نکردند و با سلاح گرم آتش گشودند که نتیجه آتش متقابل، رهبر و یکی از اعضای باند کشته و بقیه به خاک افغانستان فرار کردند.
گزارش می‌افزاید:«گروهی متشکل از چهار نفر به رهبری آذرخان ولد سعید عمر، حدود ۵۰ ساله، اهل افغانستان، به طور غیرقانونی از مرز دولتی تاجیکستان عبور کردند و سعی داشتند مواد مخدر را به تاجیکستان منتقل کنند.»
گفته شده که در محل حادثه مقداری سلاح و مهمات نیز از قاچاقچیان به دست آمده است.
کمیته امنیت ملی تاجیکستان از شهروندان خود به ویژه ساکنان مناطق مرزی خواسته است که «در جلوگیری و شناسایی گروه‌های جنایتکار» که به طور غیرقانونی از مرز عبور می‌کنند، به مرزبانان و سازمان‌های اجرای قانون کمک کنند.
چند روز پیش نیز تاجیکستان از درگیری مرزی با قاچاق‌چیان در مرز افغانستان و کشته شدن دو نفر قاچاق‌چی در نتیجه تیراندازی مرزبانان تاجیکستان خبر داد.
قاچاق مواد مخدر و فعالیت گروه‌های تروریستی در مناطق شمالی افغانستان، از نگرانی‌های دایمی کشورهای آسیای میانه، به ویژه تاجیکستان بوده است.