ویدیویی از اظهارات مولوی امانالدین منصور فرمانده قول اردوی عمری طالبان در زون شمال شرق افغانستان، در یک بحث خودمانی در باره حمله به تاجیکستان، در شبکههای اجتماعی نشر شده که در آن این فرمانده طالبان میگوید:« گرفتن تاجیکستان به کله[عهده] من.»
او در ادامه میگوید که طالبان کندز، تخار و بدخشان به گرفتن تاجیکستان کافی است.
عضو دیگر طالبان که در این مجلس حضور دارد، به تایید حرفهای فرمانده امانالدین در باره گرفتن تاجیکستان، میگوید:« هیچ چی هم ندارد تاجیکستان.»
سپس رشته سخن را عضو دیگر طالبان به دست گرفته میگوید:«آنها مرده را ندیدهاند و یکی را بزنید، کل شان میگریزند.»
منظور این عضو طالبان این است که نیروهای نظامی تاجیکستان توان و روحیه ایستادگی دربرابر تهاجم طالبان را ندارند، زیرا تجربه جنگ و کشتار را ندارند.
این گفتوگوی خودمانی در باره گرفتن تاجیکستان توسط طالبان ادامه پیدا میکند و فرمانده امانالدین ادامه میدهد:«بخدا همین مجاهدین خود ما همین حالا امر کنی، بسته ولایت بدخشان شان را[بدخشان تاجیکستان] را میگیرند. همینطور شوقی هم هستند و شله هم هستند که یک بار شما قومنده کنید.»
این بخش از اظهارات این فرمانده طالبان نشان میدهد که در میان طالبان بدخشان حمله به تاجیکستان مورد بحث بوده و افراد طالبان آمادگی و انگیزه کافی برای انجام این کار دارند.
فرمانده امانالدین در ادامه بحث گرفتن تاجیکستان میگوید: یک مشکل کمی روسها هستند. این روسها هم حالا در جنگ اوکراین اینقدر مبتلا شدهاند؛ خدا زد شان.»
زمان ومکان دقیق ضبط این ویدیو مشخص نیست.
این فرمانده ارشد طالبان در ولایت مرزی بدخشان با تاجیکستان در حالی از اشتیاق افراد طالبان به گرفتن تاجیکستان و سهلالحصول بودن این هدف، سخن میگوید که در گذشته بارها علمای دینی نزدیک به طالبان در ولایت بدخشان و ولایتهای شمال شرقی هم مرز با تاجیکستان، دولت تاجیکستان به رهبری امام علی رحمان را تکفیر کرده و جهاد بالای آن را فرض خواندهاند.
این اظهارات فرمانده امانالدین در واقع تایید کننده نگرانیهای امنیتیای است که کشورهای همسایه شمالی افغانستان به ویژه تاجیکستان از رشد تروریزم و افراطیت در افغانستان مطرح میکنند.
مقامهای تاجیکستان، بارها اعلام کردهاند که از فعالیت گروههای تروریستی در افغانستان که تحت حمایت طالبان قراردارند، نگراناند. به ویژه تاجیکستان نگران فعالیت گروه تروریستی انصاراالله تاجیکستان است که به گفته منابع امنیتی در مناطق مرزی با تاجیکستان مستقر هستند و فعالیتهای تروریستی در تاجیکستان را رهبری میکنند.
تاجیکستان، از کشورهایی است که روابط رسمی با طالبان ندارد و دفتر مرکزی جبهه مقاومت ضد طالبان به رهبری احمد مسعود دراین کشور موقعیت دارد.
کشورهای عضو پیمان امنیت جمعی که تاجیکستان نیز عضوی از آن است، اخیراً اعلام کردهاند که تقویت مرز تاجیکستان با افغانستان از برنامههای این سازمان برای سال جاری میلادی است و ترتیبات لازم به این منظور گرفته شده است.
گفتنی است که نیروهای نظامی روسیه در مرز تاجیکستان مستقر هستند و بخشی از امنیت مرزی تاجیکستان به عهده آنان است.
فرمانده ارشد طالبان در بدخشان: مجاهدین شوقی گرفتن تاجیکستاناند
