رسانهها به نقل از منابع محلی در ولایت شمال شرقی تخار گزارش دادهاند که مولوی نورالله نوری، وزیر اقوام و قبایل حکومت خود خوانده طالبان، در سفری که به این ولایت داشته، خواستار همکاری و رابطه دوستانه با تاجیکستان شده است.
به گفته منابع، مولوی نورالله نوری این سخنان را هنگام بازدید از منطقه مرزی شهرستان/ولسوالی دشتقلعه ولایت تخار، بیان کرده است.
روزنامه هشت صبح در گزارشی گفته که این مقام طالبان خواهان روابط نیک با تمام کشورهای همسایه افغانستان، از جمله تاجیکستان، شده است.
در گزارش هشت صبح آمده که «وزیر اقوام و قبایل طالبان گفته است که پس از سفر هیأت دیپلماتیک تاجیکستان به کابل، روابط سیاسی این گروه در حال بهبودی است و به زودی تاجیکستان روند ارایه خدمات قنسلیاش را در کابل آغاز میکند.»
این مقام طالبان در حالی خواهان تامین روابط دوستانه با تاجیکستان شده که سه روز پیش، جبهه مقاومت ملی افغانستان در بیانیهای گفت که گروه شبهنظامی جماعت انصارالله تاجیکستان با همکاری طالبان در صدد سرنگونی حکومت تاجیکستان است.
گفته میشود که جماعت انصارالله با طالبان بیعت کرده و اکنون در نقاط مرزی افغانستان و تاجیکستان حضور دارد.
تاجیکستان از حامیان جبهه مقاومت ملی به رهبری احمدم مسعود محسوب میشود و دوشنبه بارها از موجودیت تهدیدهای امنیتی ناشی از گسترش فعالیت گروههای تروریستی در خاک افغانستان زیر حاکمیت طالبان هشدار داده است.
همچنین هفته گذشته رسانههای تاجیکستان از سفر رییس سازمان استخبارات نظامی پاکستان-آی اس آی، به دوشنبه پایتخت تاجیکستان خبر دادند.
طبق گزارشها، رییس آی اس آی در دیدار با امام علی رحمان رییس جمهوری تاجیکستان در مورد مسایل امنیتی و همکاریها میان دو کشور گفتوگو کرده است.
سفر رییس آی اس ای به دوشنبه در حالی انجام شد که تنشها میان طالبان افغانستان و پاکستان پس از حملات هوایی شدید پاکستان به ولایت شرقی پکتیکا تشدید شدند.
در بحبوحه تنشها میان طالبان و پاکستان، برخی از رسانهها از اشغال شهرستان واخان بدخشان(نقطه مرزی مشترک میان پاکستان، چین و تاجیکستان) خبر دادند. خبری که مقامهای پاکستان آن را تکذیب کردند.
در همین حال، به تازگی جبهه مقاومت ملی از آغاز گفتوگوها با پاکستان در مورد مقابله با تهدید مشترک طالبان خبر داده است. حفیظ منصور عضو ارشد جبهه مقاومت ملی گفته که این گفتوگوها با پیشنهاد پاکستان آغاز شده است.
ناظران میگویند که سفر وزیر اقوام و قبایل طالبان به ولایت تخار و دیدار او از مناطق مرزی با تاجیکستان، به تحولات دیپلماتیک اخیر میان تاجیکستان و پاکستان و پاکستان و جبهه مقاومت پیوند دارد. به اعتقاد ناظران، طالبان با درک این واقعیت که همکاری پاکستان با تاجیکستان و جبهه مقاومت ملی میتواند برای دوام حاکمیت طالبان در شمال شرق افغانستان خطرساز باشد، از در آشتی و تعامل با تاجیکستان وارد شده و تلاش دارند تا مانع نزدیکی تاجیکستان و پاکستان شوند.
درخواست دوستی طالبان به تاجیکستان، پس از تشدید تنشها با پاکستان
