رسانه‌های تاجیکستان از ارسال ۳۰۰۰ تن مواد غذایی، البسه ومصالح ساختمانی از سوی دولت این کشور به زلزله‌زدگان ولایات مشرقی افعانستان خبر داده‌اند.
امام علی رحمان رییس جمهوری تاجیکستان خبر ارسال این کمک‌ها را در صفحه اکس خود نشر کرده است.
در این خبر آمده که مقدار این کمک‌ها ۳۰۰۰ تن است و شامل ۲۴ نوع مواد ضروری از جمله آرد، روغن، شکر، برنج، تخت خواب، لباس و کفش برای کودکان، نوجوانان و بزرگسالان، خیمه، مصالح ساختمانی همچون میل‌گرد، تخته، سمنت و دیگر کالاها می‌شود.
رسانه‌های تاجیکستان ارسال این کمک‌ها را«نشانه‌ای واضح از همدردی مردم تاجیکستان با مردم برادر افغانستان و سیاست انسانی و همسایگی خوب تاجیکستان و رهبر ملت محترم امام‌علی رحمان» توصیف کرده‌اند.
تاجیکستان در حالی از ارسال کمک به زلزله‌زدگان کنر خبر می‌دهد که این کشور روابط سیاسی رسمی با طالبان ندارد و از حامیان نیروهای مخالف طالبان به شمار می‌رود.
این در حالی است که سازمان‌های امدادرسان در ولایت شرقی کنر گفته‌اند که مقدار کمک‌های برای آسیب دیدگان کافی نیست و به دلیل محدودیت‌های طالبان، نبود زیرساخت‌های مواصلتی و پایین بودن ظرفیت اداره‌های محلی، روند کمک رسانی با مشکل مواجه بوده است.
روز یکشنبه هفته گذشته زلزله شدیدی ولایت کنر در شرق افغانستان را لرزاند که در نتیجه آن بیش از دو هزار نفر کشته شدند و بیش از ۴ هزار نفر دیگر زخمی شدند.
برخی از کاربران شبکه‌های اجتماعی، کمک‌های تاجیکستان را به کمک ۴۰ هزار دالری چین به زلزله‌زدگان مقایسه کرده و گفته‌اند در تناسب به کوچک بودن و فقیر بودن تاجیکستان، کمک‌های این کشور چند برابر بیشتر از کمک‌های چین است.