اداره مهاجرت، پناهندگان و شهروندی کانادا در بیانیه‌ای گفته است که «عمیقاً نگران گزارش‌های اخراج مهاجران افغانستان توسط تاجیکستان» است.
گفته می‌شود که حدود ۳۰۰۰ مهاجران افغانستان در تاجیکستان تحت حمایت مالی کانادا منتظر بررسی پرونده‌های پناهندگی خود هستند و با دستور اخراج از سوی دولت تاجیکستان روبرو شده‌اند.
شبکه خبری سی بی سی، گزارش داده که شماری از مهاجران افغانستان مقیم تاجیکستان که به کانادا درخواست پناهندگی داده‎‌اند، در خطر بازگرداندن اجباری به افغانستان قرار دارد. آنان از کانادا خواسته‌اند که روند حمایت مالی و پرونده مهاجرتی شان را تسریع کند تا از خطربازگشت به افغانستان در امان بمانند.
رفیع فردوس، یکی از اعضای شورای افغانستان-کانادا، با اشاره به وضعیت مهاجران افغانستان در تاجیکستان خواستار اولویت دادن به پرونده‌های آنان شده است.
در گزارش سی بی سی به نقل از هلن تیبو، دانشیار علوم سیاسی در دانشگاه نظربایف در قزاقستان آمده که ممکن است تصمیم تاجیکستان برای بازگرداندن پناهندگان افغانستان، تحت تأثیر فشارهای سیاسی و اقتصادی منطقه‌ای و الگوبرداری از سیاست‌های کشورهای دیگر باشد.
او گفته است که تاجیکستان ممکن است از روسیه که طالبان را به عنوان حاکمان مشروع افغانستان به رسمیت شناخته است، پیروی کند.
وی افزوده است: «هر زمان که روسیه کاری انجام می‌دهد، تاجیکستان یکی از اولین کشورهای آسیای مرکزی است که از آن پیروی می‌کند.»
بسیاری از مهاجران افغانستان مقیم تاجیکستان از میان مخالفان طالبان هستند.
تاجیکستان با سقوط جمهوریت در افغانستان مرزهایش بر روی افغانستان را بست و تعداد اندکی از شهروندان افغانستان توانستند به این کشور بروند.
در این اواخر، کشورهای ایران و پاکستان دو همسایه غربی و جنوبی افغانستان نیز روند اخراج مهاجران افغانستان را تشدید کرده که با نگرانی‌های جدی نهادهای مدافع حقوق بشر مواجه شده است.
طبق گزارش سازمان ملل، بیش از دو میلیون مهاجر افغانستان در چهار ماه اخیر از ایران و پاکستان اخراج شده‌اند و به صف بیکاران و گرسنگان در افغانستان پیوسته‌اند.
نهادهای امدادرسان هشدار داده‌اند که اخراج گسترده مهاجران افغانستان، موجب تشدید بحران بشری در این کشور شده است و ظرفیت نهادهای کمک کننده، برای رسیدگی به نیازمندان به شدت کاهش یافته است.
طالبان به عنوان مدعیان حاکمیت در افغانستان، تا کنون هیچ طرح و برنامه‌ای برای رسیدگی به مشکلات مهاجران برگشت کننده، جلوگیری از مهاجرت و تامین معیشت شهروان افغانستان ارایه نکرده‌اند.
تهدیدهای طالبان، بیکاری و گرسنگی شدید از عوامل درشت مهاجرت شهروندان افغانستان به شمار می‌روند.